హృదయం ఒక కుక్క :
ఆకాశానికి మొరెత్తి
రాత్రల్లా ఏడ్చింది.
------
ఇక్కడ బాట చీలింది.
ఏ బాటపైనా ఎవరూ లేరు :
ఎందుకు చీలినట్లు ?
-----
గుండె బీటలు పడితే
దిగుళ్ళు తప్ప
అన్నీ కారిపోతాయి.
------
మబ్బు పట్టిన సాయంత్రం
ఎదురింటి కిటికీలు మెరిసాయి :
సూర్య దర్శనం !
------
హటాత్తుగా వచ్చిన వాన
నా ఒళ్లో పిల్లాడి కళ్ళనీ
చెట్ల ఆకుల్ని మెరిపించింది.
------
ఊరంతా బురద :
సరీసృపంగా నన్ను సృజించనందుకు
దేముడికి కృతజ్ఞతలు.
------
No comments:
Post a Comment