చార్లీ చాప్లిన్

నా చిన్నపుడు కడు పుబ్బించే
నవ్వుమాత్ర లిచ్చి
జీవిత జ్వరాన్ని మాన్చేవాడు.
ఇప్పుడు విషాద
కషాయ మిచ్చి
నయం చేస్తున్నాడు.

ఏ వయస్సుకి ఏ మందివ్వాలో
ఈ విదూషకుడికి తెలుసు.

20.3.1985

పికాసో

పికాసో చిత్రమైన
అచిత్ర కారుడు,

అతడు గీసింది కన్నా
చెరిపింది ఎక్కువ:

మన కళ్ళ మీది కటకటాల్ని
కుంచెతో చెరిపేశాడు.

అప్పట్నించీ మన కళ్ళు
ఎగరటం నేర్చుకున్నాయి.

11.10.1983

ధనియాల తిప్ప (ముమ్మిడివరం తాలూకా)

అంతా ఒక తెల్ల కాగితం.

అందులో ఒక మూలగా
ఒక అడ్డుగీతా
ఒక నిలువు గీతా -
తెరచాప ఎత్తిన పడవ.

కిందిది నదీ
పైది ఆకాశమూ
కావొచ్చు.

3.10.1983